【明報專訊】泛民、建制派在立法會不時針鋒相對，拉布問題亦搞到建制派好不滿，但時不時同拉布議員嗌大交嘅民建聯蔣麗芸（Ann姐），噚日就成功團結跨黨派嘅立法會議員，可以話係非常難得。Emily講緊嘅係，Ann姐提出有關「強化職業教育」嘅無約束力議案，喺52票贊成、0票反對、0票棄權嘅高票下通過，即使係其他議員提嘅修正案亦全數喺無人反對下通過，可以話係近年罕見。

 

52票贊成零反對 近年罕見

 

保險界陳健波發言話，香港經濟已進入成熟期，大學生已經唔係天之驕子，反而有一技傍身先至更加有保障。民建聯譚耀宗就話，港人對「萬般皆下品、唯有讀書高」嘅想法根深柢固，唔少技術工人工資偏低，減低青年入行興趣，覺得有必要提升技術工人嘅工作環境和薪酬，又叫家長學生要抱住「行行出狀元」嘅心態。

 

吳克儉：家長支持職業教育

 

教育局長吳克儉就回應話，學生同家長已經改變認為職業教育係次等嘅想法，部分家長開始支持子女轉投職業教育，認為職業教育令子女喺職場上具備優勢，所以政府會致力推動生涯規劃同加強職業教育喎。