食衞局局長「民望高」高永文早排落區同市民激辯政改突然肝火盛，話「講完」就轉身走人，之後民望即刻插水啦!佢就話唔後悔喎！上周白鴿黨卿姐訪問「民望高」，仲幫佢夾咪又碰杯，搞到佢受寵若驚。

 

「民望高」都咁得人歡喜，民記元秋(蔣麗芸)噚日又邀請佢到節目「蔣麗芸會客室」。「元秋」大讚局長「講完！」嗰下「嘩，幾man啊！」又引述「朋友」話「咁樣先係一個局長，好有性格，好有真性情」。「民望高」就只係笑笑口話「其實我唔係想咁」。

 

「民望高」話係有心理準備面對唔同政見嘅人，亦諗咗方法應對，「如果佢同我講，話佢有唔同意見，反對2017，反對袋住先諸如此類，我反而覺得無問題，呢個可以傾」。但佢話，嗰位街坊用咗啲侮辱性形容詞，去形容兩位有可能被1,200人(提委會)代表選出作為特首候選人嘅人，「當然我唔可以贊成，都唔可以唔出聲啦」；佢「誤導小朋友」，就「唔可以接受」啦！

 

「民望高」話，對住小朋友係特別小心，唔希望佢哋「阿媽話支持就支持」，嗰位街坊冇聽到佢同小朋友嘅對話，就話佢誤導，佢有責任解釋清楚。但佢都承認，事件之後收到好多嚴厲批評，自己覺得可以嘗試用吓啲溫和語調去爭取辯論空間嘅！