(摘自6.25 巴士的報)

CY昨晚離港放假，本來有人猜測佢俾阿爺急召上京接旨，Ariel昨日寫過聽聞佢一早定咗呢幾日放假去英國，原來係去參加三女在劍橋大學的畢業典禮。

 

今日網上傳出疑似佢二女出問題的消息，令人好擔心，Ariel就收到料，CY已到咗英國，並且去咗探二女，仲一齊喺倫敦晨光下合照，見到兩人都笑得咁開心，都令人放心啲。

 

據講張相係香港時間今日下午大約二點左右影的，即係倫敦時間早上七點，齊昕仲抱住隻英國鬥牛(據她在facebook講隻狗個名叫Speedy)，唔知齊昕係唔係見到爸爸，笑容都燦爛啲。

 

CY先到倫敦會合二女，然後就一齊去劍橋，在那邊住一晚，明日出席三女的畢業禮，然後一完咗就飛返香港。即係話佢其實佢只係在英國瞓一晚，在飛機的時間同隻腳著地的時間差唔多。