呢個咁有爭議性嘅政改方案前日終於提交畀立會辯論，好多議員都趁呢個世紀時刻發言，除咗道具之外，唔少議員仲大爆金句添！好似工記嘅興哥(王國興)前日發言時，就有道具兼有聲線啦！當佢講到話泛民點變臉就好激動，拎住幅畫嚟「解畫」提高聲線，以高八度嚟講嘢，仲唔小心走埋音添！梗係成為網民恥笑對象啦！

 

同樣成日喺立會大大聲發言嘅民記元秋(蔣麗芸)，噚日就被問到點睇興哥被人笑？元秋話，佢自己平時嘅聲線都「OK」，都承認幾大聲嘅！但轉個頭，佢就加入埋笑興哥嘅行列，笑笑口話興哥高音嗰時，佢就會同興哥講走咗啲音喎。

 

元秋仲教路話，發言時應係「該激動時激動，該傷心時傷心，一個人最緊要係真情流露啦。」

 

提到黨友象哥(黃定光)畀人捉到喺會議睇性感女郎片段，講起近排fb突然興起大量sex secret專頁，元秋聽到其中一個係「立會sex secret」，話好surprise囉！但佢竟然無啦啦踩立會主席兼黨友曾鈺成，話曾主席咁嘅樣，會有啲咩sex secret喎！曾主席今次真係躺着也中槍喇！