傳媒報導

都 市 日 報 | 2015-06-23 P16 |

政 界 人 過 爸 爸 節   溫 馨 sweet 爆 

前日係父親節，一班建制派議員雖然近日煩惱緊「等埋發叔」嘅風波入面，但都不忘抽時間同至親慶祝一番。好似因為無離場而成功投到贊成票、兼畀中聯辦讚嘅富貴黨田少(田北俊)，父親節亦有同仔女撐枱腳喎！

 

田少之前喺fb上載咗張戴眼鏡嘅豬相，留言話「邊有咁多陰謀論啊，主要係人蠢無藥醫。」疑似寸盡一班甩轆議員。佢前日喺fb post咗張慶祝父親節嘅相，留言疑似繼續抽水，話「呢排豬肉少食，都係牛肉他他好味！哈哈！多謝對仔女請我食飯，慶祝父親節。」

 

另一邊廂，喺fb度話建制戇居、自我嘅民記元秋(蔣麗芸)，都有同90幾歲嘅老爸蔣震慶祝，仲好感性留言話「無論年齡多大，在父親面前永遠都是小孩子。」

 

有網民就關心蔣老父點評價元秋嘅議員表現，元秋話「各人做事，有人欣賞，有人不滿，但求無愧於心，盡己努力，我父親了解我。」

 

至於政改爭拗，亦隨住方案被否決暫時告一段落，佔中三子之一嘅陳健民應該會得閒啲。父親節佢都有禮物收，就係囡囡親手整咗本書畀佢，入面貼滿佢嘅相，仲寫滿囡囡對爸爸嘅感激之情。咁sweet，難怪陳健民話，係14年嚟最快樂嘅父親節啦！