當上立法會議員後，蔣麗芸人氣火速急升，開會、出席活動，日日忙到甩轆，雖然議事廳「千奇百趣」，但對她而言，都不及回家與愛犬玩耍來得輕鬆。她養了玩具貴婦狗Baby三年半，作為牠的主人，最重要的任務就是陪牠玩。「因為只得一隻，冇其他伴，好慘。」平日她下班回家累到不懂言笑，但一見到Baby衝出來歡迎她，就立即重現歡顏。

 

得寵的Baby有不少玩具，最常玩的是「拋波仔」，「有時我做緊野唔睬佢，Baby好搞笑，會拿不同顏色的波引我注意，令我不能不睬牠。It's lovely。」

 

好不容易等到立法會休會唞暑，Ann姐就「有咁遠去咁遠」，通常去歐洲、法國及澳洲，多數兩公婆結伴，要不就呼朋引伴，但自從當上立法會議員，這種要長時期計畫的旅遊，已跟她「揮手道別」，「現在有好多立法會及地區工作，都要優先處理，好難約到朋友，費事甩人底，所以已有三年冇同朋友去旅行。」

 

最愛坐郵輪遊埠

 

早排Ann姐被逼「佔領郵輪」，原來在郵輪見到她，並非奇事。她自稱郵輪專家，認為最歎的旅遊方式，就是坐郵輪遊埠，行程全部有人安排，可以輕鬆上路，過往去過多瑙河、地中海、黑海、俄羅斯及阿拉斯加，感覺如何？一句講晒「正」！她說坐在房間露台，一邊曬太陽，一邊看住海睇書，非常悠閒。每日又可踏足新地方玩足一日，晚上才回到船上。

 

她計畫下次遊覽萊茵河，「那裏風景好靚，一定要去咖。」除了坐船，她也會駕車，試過在英國自駕遊十日，駕了幾千公里前往不同城市，「一早睇好晒地圖，跟住條路嚟玩，完全冇時間限制，非常寫意。」

 

若然無暇出埠，她放假多與家人行山、吃飯，最愛行石梨貝水塘，但有時都幾驚險。話說多年前，有次她行近馬騮山，當時手上拿着一件白色風褸，冷不防有隻馬騮撲了出來，「當時我好驚，諗住拿件風褸嚇走牠，點知被牠一手搶去，我諗住算啦，件褸畀左佢，費事牠來搞我，容乜易佢吹雞班馬，跑來十幾隻馬騮仔，咪仲驚。」從此，她與風褸分道揚鑣。Ann姐無奈笑說：「日後行山時，如果見到有馬騮仔穿着白色風褸，那件褸應該是我的。」